PASOSORÉ DI BASISIR SINDANGBARANG

Lambak nyéblok ngadadak sumeblak.
Nyimbeuhan beungeut haté.
Nu teu weléh keueung.

Niténan kaahéngan alam dunya.
Neuteup jaladri nu taya karisi.
Dibarung jelegurna ombak nu teu galideur.
Lir satria tandang tanggoh.
Makalangan di pangperangan.

Laut nu ngalamuk.
Ngahudang wawanén nu langka dipaliré.
Kikisik nu busik.
Ngusikkeun pikir nu taya tiiranana.
Surya rék surup.

Dulur !.

Sumanget téh kudu gumuruh lir lambak.
Ambahan téh kudu lega lir laut.
Haté téh kudu tengtrem lir paulna nu ngalamuk.
Teu gedag ku angin nu ngagelebug.
Teu paur najan panonpoé surup.
Tigin tagen ngemban pancén ti Yang Widi.


Etti RS.

(Tina kumpulan Sajak Jamparing).